Israel leh Lebanon helpawl, Hezbollah inkar boruak a ṭang chho zel a, inbeihna nasa zawk kalpuiah an invau tawn. Ram dangten inbengdai a, indona nasa zawk ti chhuak thei boruak siam lo tura an ngenna pawhin awmzia a la nei rih lo.

Hezbollah deputy chief, Naim Qassem chuan an pawl in Israel nena an indonaah a bi thar an kai tih a puang ve leh. Hei hi Israel-in Lebanon hmarlama Hezbollah hmun hrang hrangte bei a, chhiatna nasa tak a thlen hnua a sawi a ni.

Israel defence minister Yoav Gallant chuan an ram hmarlama cheng, Israel mite himna chu an ngai pawimawh hle dawn tih sawiin, Hezbollah te beihna vanga hmun him lama tlanchhiate an mahni in lum ngeiah him taka an kir leh hma chu Israel sipaite chuan hma an la zeldawn tih a sawi. Israel army chief lieutenant general Herzi Halevi chuan mi tupawh, Israel mi leh sate himna tiderthawng zawnga che chu an kap zel dawn tih a sawi.

Israel Defence Force (IDF) chuan nimin zing khan ramri bul, Lebanon chhim lam khuaa chengte chu text message leh recorded message hmangin rang taka an awmna hmuh chhuahsan turin a hriattir. Hezbollah hoin ralthuam an thuhrukna bul hnaia awmte chu insaseng tura hrilhin, hei hi an himna tura hriattir na a nih thu an tarlang.

IDF thupuangtu, rear admiral Daniel Hagari chuan Lebanon-a network leh platform hrang hrangah Arabic-in warning hi an pek thu a sawi bawk. Insawn chhuak tura an tih hian mi eng zat chiah nge a nghawng dawn hriat theih a la ni lo. Hetih lai hian Israel hmarlam, Lebanon ramri bula cheng Israel mi tam tak chu Hezbollah te beihna vang hian hmun him lamah an lo insawn ve tawh bawk a ni.