Iran : Communication device hmang lo turin IRGC member te hriattir

Iran elite Revolutionary Guards Corps (IRGC) chuan an member-te chu inbiakpawhna hmanrua, device engmah hmang lo turin a hriattir. He thil hi Hezbollah ten inbiak pawhna atana an hman, pager a puah vak vang a ni.

Security official chuan IRGC chuan inbiakpawhna atana an hman chauh ni lo, an device hman dangte pawh enfiah hna an thawk mek tih a sawi. Heng device te hi a tam zawk chu an ram chhunga siam leh, China leh Russia aṭanga an lak luhte an ni.

IRGC hian Israel agent-te an inrawlh hlauhthawnna nasa tak neiin, an mi leh sate chhui chian hna pawh a thawk mek bawk. Iran leh ram pawn lama an bank account neihte , an zinkual dan leh an chhungte chanchin thlengin chhui chian vek a ni dawn tih official chuan a tarlang.

IRGC-ah hian sipai 190,000 vel an awm mek a, heng sipaiten inbiakpawhna atana an hmante erawh official-te chuan an sawichiang duh lo a, messaging system-end-to-end encryption an hmang tih chauh an sawi a ni. IRGC hi political, military leh economic force chak tak, Iran ram hotu lu ber, Supreme Leader Ayatollah Khamenei nena inzawmna ṭha tak nei an ni. 1979 Islamic Revolution hnua an ram inrelbawl dan humhalh tura din an ni a; ground force, navy leh air force te an nei. Hezbollah te device hmante chu IRGC official-te chuan enfiah turin an dil a, Iran expert-ten an zirchian turin device puak ṭhenkhat chu thawn an ni tawh bawk.