Sri Lanka President thar la lut

Sri Lanka President atan Anura Kumara Dissanayake chu nimin, September 23, 2024 khan rinawmna thu tiam tira lak luh a ni.

Inrinni liam ta khan Sri Lanka President thar tur hi thlan a ni a, mahse candidate zingah tling tura vote hmuh ngai, vote tla aṭanga 50% hmu an awm phak loh avangin vote hmu sang pahnihte chuan Pathianni khan inthlan thawh hnihna an hma chhawn a ni. Inthlan thawhnih naah hian National People’s Power (NPP) candidate, Janatha Vimukthi Peremuna (JVP) party hruaitu Anura Kumara Dissanayake leh eptu pawl Samagi Jana Balawegaya candidate, Sajith Premadasa aṭangin President tur hi an thlang leh a, Dissanayake hian hnehna a chang ta a ni.

Kum 55 mi, Dissanayake hi Colombo-a Presidential Secretariat-ah President thar atan lak luh a ni a, chief justice-in rinawmna thu a tiam tir a ni. President atana lak luh a nih hnuah thu a sawina hmasa berah, Dissanayake chuan an ram mipuiten politician-te chungah rinna an nghah ngamna turin theihtawp a chhuah dawn tih a sawi a, thil tam tak hriat loh pawh a nei dawn a, hei vang hian mipuite thawhpuina leh thurawn an pekte a mamawh dawn tih a sawi.

Dissanayake hian inthlan dawna a campaign au hla berah eirukna nuaibo a, mi rethei khaichhuahna tur policy siam leh, politics thianghlim tak siam chhoh a tiam. Manufacturing, agriculture leh IT sector tih hmasawn a, an ramin leiba tam tak a neih mek laka khaichhuahna tura International Monetary Fund (IMF) nena inremna an siam chu kalpui chhunzawm a tiam bawk a, hemi rual hian inrenchemna an kalpui avanga mi rethei zawkte tana harsatna nasa tak thleng chu tihzia awm dan kawng zawn a tiam bawk.

President thar lak luh a nih hma hian Sri Lanka prime minister, Dinesh Gunawardena chuan banna a thehlut ve nghal a ni. Gunawardena hian kum 2022, July thla aṭang khan PM dinhmun hi a chelh a ni.