Myanmar sipai sorkar chuan emergency a puan mek chu thla ruk chhung atan pawhsei chhunzawm a ni leh tih July 31, Nilaini khan a puang. Emergency pawhsei hian inthlan neih hun tur chu a tikhawtlai leh dawn ta a ni.
Sipai sorkar hian civil sorkar thuneihna an hnehchhuh hnuah emergency hi puang zui nghalin, kum hnih chhung an puan hnuah pawh helpawl chetna a la hluar zel avangin pawhsei chhunzawm a ni tih an sawi a, an ram inthlanpui neih tur pawh an la huaihawt thei dawn lo tih an tarlang.
Sipai sorkar thunun, National Defence and Security Council chuan lungrual takin thla ruk chhung atana state of emergency pawhsei chu a pawm a ni. Sipai hotu Min Aung Hlaing chuan emergency chu inthlan rintlak leh dik an neih theih nan pawhsei a ngai niin a sawi. Sipai sorkar hian inthlan hi neih ngei an tiam a, a hun tur erawh la sawichiang loin kum 2025-a buatsaih hman an tum a ni.
Myanmar-ah hian kum 2021, February thlaa sipai ten thuneihna an chan aṭangin tualchhung buaina a la thleng chhunzawm reng a, ram chhung boruak a la ralmuang thei lo a ni. Mipui sorkar kum 10 chhung ding tawh paihthlak a ni chu duh loin mipuite chuan lungawi lohna nasa takin an lantir a, sipai sorkar chuan heng mite hi na takin a do let a ni. Sipai sorkarin kum 2008-a dan an siamah chuan thla ruk chhung awh tur, state of emergency a zawh hunah a thara inthlan nei tura dan zam niin he dan hi hman a la ni reng tih sipai sorkar chuan an tarlang bawk. Mahse census kalpui a ngaih avang leh hnathawh tur an la neih avangin emergency hi pawhsei nia tarlan a ni.
