Iran Supreme Leader-in Israel bei turin thu a pe

Iran ram hotu lu ber, Supreme Leader Ayatollah Ali Khamenei chuan an ram khawpui, Tehran-a missile hmanga Hamas hruaitu, Ismael Haniyeh thah a nih avangin phuba an la dawn tih a sawi hnuah, Israel beih letna tur thupek a ti chhuak niin media lam chuan an tarlang.

Iran Supreme Security Council-in Nilaini zinga emergency meeting an neihnaah Khameinei hian Israel beih letna tur thupek hi a pe chhuak a, Hamas hruaitu lu thah a nih thu puanzar a nih hnu lawkah beih letna tur thupek hi a chhuah ve nghal a ni. Khameinei chuan hemi hma hian a mimal website-a thu a chhuahah, Israel chu he thil thleng avang hian an chungah tawrhna leh hremna tawk tura inpuahchah turin a lo vau lawk tawh bawk.

IRGC chuan thuchhuah pahnih an siamah, Nilainia Haniyeh leh a bodyguard pakhat, Tehran-a an chenna hmun beihnaa thah an nih chungchangah Israel chu mawhphurtu ni ngeiin a puh a ni. Haniyeh leh a bodyguard chu an ram mite chuan an uiin an sun hle tih an sawi a, hei bakah Haniyeh hi Iran President thar, Masoud Pezeshkian rinawmna thutiam laknaa tel ve tura sawm mi pawimawh zingah a tel ve nghe nghe tih an sawi. Hamas -hruaitu hian a hma pawhin Iran hi a lo tlawh fo tawh ṭhin a ni. IRGC te chuan rawlrala chetna hi an dem hle tih sawiin, khawvel dan leh inkaihhruaina palzutna a nih thu leh Israel chuan hremna leh chhanletna hrehawm tak Iran lak atangin an dawn ngei an rin thu an sawi a ni.

Iran President Masoud Pezeshkian pawhin social media platform lian, X-ah Haniyeh thihna chu a tawrhpui thu sawiin, Iran chuan a ramchhunga a chanvo leh zahawmnate humhim turin a bei zel dawn tiin, Israel-te rawlrala an chetna leh an khawsak dan tenawm tak chu a dem thu a tarlang bawk.