Tuilian vanga harsatna tawk NKorea ṭanpui turin SKorea a inpeih

South Korea Red Cross chuan tun hnai ruah sur nasa vanga chhiatna tawktu, North Korea hnenah chhawmdawlna thawn lut turin an inpeih tih an tarlang. Hei hi ram pahnih inkara thil thleng khat tak a ni.

SKorea Red Cross chuan an ram thuneitute chu NKorea in chhawmdawlna an mamawh leh ṭanpuina thawn a nih dan tur sawi ho turin an inpeih tih a tarlang a, an inhuamthu an sawi hi NKorea lam chuan an chhan let thuai a beisei tih an tarlang bawk. SKorea sorkar-in an ṭhenawm ram ṭanpui an inhuam thu hi SKorea Unification ministry chuan a puang a, Red Cross hian an bawhzui a ni.

NKorea hmar thlang lamah tun hnai hian ruah nasa takin a sur a, Sinuiju leh Uiju region-ah chenna in 4,000 chuang tuilian chuan a chim mek tih North Korea state media chuan a tarlang. Tuilian vanga thi hi mi 1,100 an tling tawh nia tarlan niin mi 1,500 chuang chin hriat lohin an awm mek tih an tarlang bawk.

Kim Jong Un chuan tuilian thlenna hmun a tlawh tawh a, chhiatna thlengin a nghawngte chu a tawrhpui thu a sawi. NKorea khawpui, Pyongyang pal tlang a luang, Taedong lui chu a len loh nan tuilian venna hna thawh mek a ni tih state media chuan a tarlang.

North leh South Korea hian tun hnaiah buaina an neih reng avangin NKorea hian an hmelma leh ṭhenawm ram ṭanpuina pek tum hi an pawm dawn em tih hriat a la ni lo. SKorea-in inbiakna neih a inhuam thu a sawi pawh hi an la chhang lo a ni.