UN humanitarian coordinator for Gaza, Sigrid Kaag chuan Gaza huamchhunga cheng mi makatduai 1.9 chu sawnchhuah an ni tawh tih sawiin, hei hi a mi cheng zinga 80% a tling niin a tarlang. Sigrid Kaag chuan tun hnaia Khan Yunis aṭanga inthiarchhuak tura Israel sipaiten thupek an chhuah chuan a timangang takzet niin a sawi bawk.

United Nations in a chhut danin, Khan Yunis leh Rafah aṭanga civil mite inthiarchhuak tura Israel sipaiten thu an chhuah chuan mi nuai 2.5 vel a nghawng dawn nia tarlan a ni. Kaag chuan Gaza-a cheng Palestinian civil mite tawrhna chu a rapthlak takzet tih sawiin, an nun zawng zawng a inthlakthleng vek a ni, tiin UN security Council a hrilh a ni. "Gaza pumah mi mtd 1.9 chu sawn chhuah an ni tawh" Kaag chuan a ti.

Gaza Strip-a indona chu mihringte tana chhiatna rapthlak tak thlentu ringawt ni loin tawrhna hrang hrang tuar tura mipuite hnukluttu a nih thu Kaag chuan a sawi. Indona thlenna hmunah chuan chhawmdawlna mamawh phuhruk zo khawp a lut lo a, inkalpawhna kawng tam zawk hawn a ngai a, a bikin Gaza chhim lamin an mamawh hle tih a sawi. Kaag chuan Gaza leh Egypt inkara Rafah luhka pawimawh chu hawn a ngaih thu a sawi a, khawvel ram dangte chu chhawmdawl hnathawh kawnga nasa zawka hma la turin a sawm nghal bawk.

UN Secretary-General thupuangtu, Stephane Dujarric chuan Khan Yunis leh Rafah aṭanga inthiarchhuak tura thupek tihchhuah chuan Gaza Strip huamchhung hmun thuma ṭhena hmun khat dawn a huam avangin nikum October hnua thupek chhuahin nghawng a ngah ber tur niin a sawi. Dujarric chuan,"Hetianga inthiarchhuahna liantham hian mipuite tawrhna a tizual dawn a ni," a ti.