South China Sea buaina chungchangah China leh Philippines palaite inbia

South China tuipuiaramri inchuh vanga buai reng, China leh Philippines palaite chuan an inkar boruak a ziaawm theih nan Thawhlehni khan inbiakna an nei.

China leh Philippine inkarah hian June 17 khan Second Thomas Shoal-ah buaina chhuakin, Philippines navy ṭhenkhat chuan hliam an tuar a, sipai lawng pahnih tihchhiat a ni bawk. Tun hnaiaha an inkar boruak a ṭhat loh avangin ram pahnih inkarah hian buaina lian tham zawk a chhuah mai a hlauhawm hle a, hemi a nih avang hian Thawhlehnia an inbiakna boruak a tihziaawm thei ngei beisei a ni.

Philippines foreign affairs department chuan ram pahnihte chuan boruak a ziaawm theih nan an ṭanhmun aṭanga inhnuhdawh an remti tih a tarlang. Tuipui lam ramri chungchanga an buainaah inbiakna vangin hmasawnna an nei tih tarlang mah se an inkar thu inhmu lo tam tak a la awm niin an sawi bawk. Philippine foreign under secretary, Theresa Lazaro chuan an ram chin humhim turin an inpeih reng tih China vice foreign minister, Chen Xiaodong chu a hrilh.

Ram pahnihte hian an inlaichinna tinghet zel turin inbiakna neih zel an remti a, tuipui lama buaina chhuak rang taka inhrilhhre ṭhin turin inremna an ziak a ni. Hemi bakah hian ram pahnih scientist-ten tuipui lama zirchianna an kalpuinaah thawh ho ṭhin ni se tiin an rel bawk.

South China tuipuiah hian Philippine leh China bakah Vietnam, Malaysia, Taiwan leh Brunei te pawh tuipui ramri vang hian an buai ve mek bawk. He tuipuia an ram chin anga ram pakhatin a chhal hi ram dang chuan an huamchhung anga an ngaih a nih ṭhin avangin ram hrang hrang hian buaina an nei mek a ni.