UK : Vawiinah inthlanpui neih a ni dawn

United Kingdom prime minister, Rishi Sunak-a'n May thlaa rampum huap inthlan an nei dawn tih a puan hnuah vawiin hian UK mipuite chuan an aiawh thlanna hun an nei dawn ta. He inthlanah hian party lian pahnih Labour party leh Conservative party te chu inbei leh ber tura rin a ni.

UK-a sorkar lai leh kum 14 chhung rorel tawhtu, Conservative party hotu Rishi Sunak chuan inthlanah chuan an chak ngei dawn tih a sawi chiang ngam lo tih sawiin, kum 1 leh thla 8 PM hna a chelh chhungin hun harsa tam tak tawk mah se tunah erawh an dinhmun a ziaawm ta deuh niin a sawi. Conservative party-in seat 650 awmna UK Parliament-a hnehna an chang thei a nih chuan an hotupa, Sunak bawk hi UK prime minister atan lakluh a ni leh dawn a ni.

UK chhunga party lian leh Conservative khingpui ber, Labour party chu tun inthlanah hian an chak zawk ring an tam hle thung. Labour party hian kum 14 hnuah sorkarna an chan leh ngei ring mah se mipuite chu rindan tihchhuah ringawta innghat lo turin an chah a, an hotu Keir Starmer chuan mipuite chu ram thlak danglam nan vote thlak turin a ngen.

UK hi kum nga dana inthlang ṭhin an ni a, December 2019 kha inthlan an neih hnuhnun ber niin, sorkar lai hian kumin December thla thleng sorkarna an la siam theih laiin UK PM Rishi Sunak chuan an hun a ral hmain UK chuan inthlan an hmachhawn dawn tih May 22 khan a puang a, mi tam tak mak tih a hlawh hle a ni.