European Union chuan Israel-in Rafah a beihna chu titawp turin a ngen a, an ngennain ngaih pawimawh a hlawh loh chuan an inṭhian ṭhatnain a tuar thei ang, tiin Israel chu a vaukhan nghal bawk.

Josep Borrell, EU foreign policy hotupa chuan Rafah aṭangin Israel-in a sipaite a hnuhkir a ngai tih sawiin, an ngenna an ngai pawimawh lo a nih chuan EU leh Israel inkarah buai a awm thei tih a sawi. EU chuan Gaza-a chhawmdawlna thawn luh tur tihbuai a ni ṭhin chuan raltlan a tihpun bakah, mipuite tawrhna a nasat phah thu leh ṭam tuar an pun phah niin a sawi.

European Union hi Israel sumdawnpui lian ber an nih bakah Palestine rama chhawmdawlna thawn luttu pawimawh tak an ni tel bawk. Israel-in Rafah-a civil mi la awmte insawn chhuahna tura a tihna hmun chu UN-in a him lo tih an sawi chu EU chuan a tuihnih ve bawk. EU chuan Israel-in a ram venghim tura a hmalakna chu an hriatthiam rualin International Humanitarian Law leh civil mite himna chu ngai pawimawh tel se an tih thu an tarlang.

Hamas-in Kerem Shalom luhka an bei chu pawi an tih thu EU chuan tarlangin, hemi avang hian chhawmdawlna phur luh kawngah harsatna a awm niin an sawi. EU chuan inkahhai puang tura inremna nei turin Israel leh Hamas chu an duh thu leh, Hamas mi hren mekte pawh an zavaia chhuah zalen vek ni se an duh thu an tarlang bawk.