Israel military intelligence chief, Major General Aharon Halive chu October 7, 2023-a Palestinian firfiak pawl, Hamas-te'n Israel chhim lam bei a, pawikhawihna rapthlak tak an thlen chungchangah mawhphurhna lain, Military Intelligence Directorate chief a nihna aṭanga banna a theh lut.
Israel Defence Force (IDF) chuan Defence Minister Yoav Gallant leh Chief of Staff Lt. Gen. Herzi Halevi-te ngenna angin, Maj. Gen. Aharon Haliva hian amah thlaktu tur ruat fel a nih hma chu a hna hi a la chelh chhunzawm dawn tih a sawi.
Haliva hian banna lehkha a theh luhah, an rama pawikhawihna rapthlak tak thleng chungchangah intelligence directorate chuan an hna an kengkawh tawk lo tih a pawm thu a sawi. Firfiakte pawikhawihna an lo dang thei lo leh, an hlawhchhamnaah mawhphurhna a la tih a sawi. Hamas pawikhawihna thlen vanga Israel senior official zinga banna theh lut hmasa ber a ni. Defence official-te pawhin October 7-a pawikhawihna thleng chungchangah hian mawhphurhna an lak thu an lo sawi tawh bawk a, mahse, banna theh lut dang erawh an awm lo.
Israel hi khawvela intelligence unit nei ṭha bera ngaih an ni a, hetih lai hian October 7, 2023-a Hamas firfiakte'n Gaza ramri hungna tichhia a, Israel chhim lama luta, tualchhung mi, military base leh music festival neihna hmunte rapthlak taka an beih chungchangah khan warning eng emaw zat an hmuh chu Israel sipai leh intelligence official lam chuan an hre lo nge, an ngaihthah tih chu zawhna lian tak a ni. Hamas-te beihna avang hian Israel mi bakah ram dang mi, a tam zawk music festival chhimtu mi 1,200 chu an thi a, mi 253 chu Hamas hian manin, Gaza-ah an hreng zui bawk. Hamas mi hren zingah mi eng emaw zat hi chu chhuah an ni tawh.
Haliva-a'n banna a theh luh hma hian, IDF chuan October 7-a Hamas pawikhawihna thlen an lo dan loh chungchang chhui leh zir chian hna hi an ṭan a ni. Intelligence Directorate chuan a chhui danah hun bi hrang hrangah ṭhenin, pawikhawihna thlen hma kum 10 chin, 2014 Gaza war ṭan aṭanga a tawp thleng, Hamas-te pawikhawihna thlen hma ni, October 1- 7 inkar, bakah October 7-a beihna rapthlak tak an tawh dan chungchangte an zir chiang dawn. June thla tir lamah report-te hi Halevi hnena theh lut tura tih a ni.
