US khua leh tui nihna nei thar zingah Mexican an tam ber

Congressional Research Service (CRS) in 'US Naturalisation Policy' report thar ber a tihchhuahah, 2022 sorkar kum chhung khan ram dang aṭanga pem, naturalisation hmanga US khua leh tui nihna nei thar mi 969,380 an awm tih a tarlang. Heng zinga a tam ber chu Mexico aṭanga pem lut an nih thu tarlan a ni bawk.

Report-in a tarlan danin, Mexico aṭanga pem lut US khua leh tui nihna nei ta hi kum 2022 chhung khan mi 128,878 an ni a, Mexico dawtah hian India awmin, India mi 65,960 chuang zetin khua leh tui nihna an nei thar ve bawk. India dawtah hian Philippines (53,413), Cuba (46,913), Dominican Republic (34,525), Vietnam (33,246) leh China (27,038)-te an awm a ni.

CSR hian kum 2023 thleng khan US khua leh tui nihna nei, ram danga piang zingah Mexican tam berin, India mite chuan an dawt a, China-a piang, a hnua US khua leh tui nihna nei ta chu a tam ber pathumna an ni tih a tarlang bawk. US-a cheng mek Indian zinga za zela 42 chu US khua leh tui ni thei lo tur an ni tih CRS chuan a tarlang bawk.

American Community Survey chuan kum 2022 thleng khan ram dang aṭanga US-a pem lut zat chu mi mtd. 46 an nih thu an tarlang ve bawk. Hei hi US mipui zawng zawng aṭanga chawhrualin 14% lai a tling pha a ni.

Naturalisation hmanga US khua leh tui nihna diltute chuan Immigration and Nationality Act (INA) in a phut angin enchhinna hrang hrang an paltlang a ngai a, heng zingah hian kum nga chhung dan pawmpuina ngeia US-a cheng nih pawh a tel a ni.