NKorea-in tuipuiah missile an kap niin SKorea-in sawi

South Korea sorkar chuan nimin zing khan North Korea-in an ram chhak lam tuipuiah ballistic missile a kap niin an sawi. South Korea joint chief of staff chuan he thu hi puangin, Thawhṭanni zing khan NKorea hian tuipuiah missile an kah ngei thu sawiin, missile an kah thlen chin erawh an hriat loh thu a tarlang.

North Korea hian thla liam ta chhung rei loteah khan ralthuam chi hrang hrang a enchhin tawh a, an ram sipai thuam chak nan leh, South Korea leh US inkar ṭha zel kara an dinhmun tarlan nana an tih niin South Korea chuan an sawi. North Korea hian Inrinni khan cruise missile lian tak an enchhin thu leh, an ram khaw thlang lamah anti-aircraft missile an kah thu a sawi bawk.

Mithiam ṭhenkhat chuan North Korea hian ram dangte tihthinrim nan an ram anniversary puala satellite kah chhuah khap chi an kah chhuah mai a hlauhawm thu sawiin, April 15 hi North Korea din chhuaktu leh Kim Jong Un-a pu, Kim Il Sung-a pian cham a nih bakah, April 25 hi North Korea military lo din ṭanna bul ṭan ni a nih avanga, he ni pawimawh lawm nan hian satellite an kah chhuah rinna an nei a ni. Hemi chungchangah hian South Korea pawhin North Korea chu spy satellite pahnihna kap chhuak tura an inbuatsaih mek thu an tarlang a ni.