Thailand chuan a thawh khatna atan Myanmar tualchhung indona thleng mek tuartu, civil mite chhawmdawlna tur chu Thawhlehni khan a thawn lut.
Civil mite ṭanpuina hi truck 10-in Mae Sot-Myawaddy border crossing kaltlangin phurh luh an ni a, hengte hi Karen state-a khaw pathumah sem an ni ang. Chhawmdawlna an thawn luh hi bawm 4,000 vel niin, a tam ber chu buhfai leh dried food a ni a, an thil thawn luh hi baht maktaduai 5 man hu vel a ni.
Thailand vice foreign minister Sihasak Phuangketkeow chuan chhawmdawlna phurtu truck-te vailiamna hun hi hmangin, an thil thawnte hi Na Bu, Thar Ma Nya leh Paingkyon khuaa mi 20,000 velin an lo ṭangkaipui thei dawn tih a sawi. Myanmar rama boruak muanawm a awm a, tualchhung buaina an neih mekte chu anmahni ngeiin an chinfel theih thuai a beisei thu a sawi.
Myanmar mipui, harsatna tawh mekte chhawmdawlna thawn an nih theihna atana Thailand-in humanitarian corridor siam a tum tih a sawi chu January thla khan Association of Southeast Asian Nations (ASEAN) foreign minister-te chuan an thlawp thu an lo sawi tawh a ni. He ruahmanna hnuaiah hian Thai leh Myanmar Red Cross-te chuan ASEAN Coordinating Center for Humanitarian Assistance on Disaster Management enpuina hnuaiah chhawmdawlna hrang hrangte hi a mamawhte hnenah an sem dawn a ni.
Hetih lai hian tam tak chuan Myanmar Red Cross hi sipai sorkarin a thunun vek a nih avangin, chhawmdawlna thawn luhte hi sipaite thununna bial chhung chauh a thleng dawn niin an sawi a, hei hi civil sorkar paihthlatu sipai sorkar tha tihchakna a ni thei dawn niin an sawi ve thung. Dinhmun harsa taka awm mek, ṭanpui mamawh zawkte chu he chhawmdawlna hian a thleng pha dawn lo a ni, an ti.
United Nations chuan kum 2021, February thlaa sipaite'n thuneihna an chan aṭanga Myanmar tualchhung buaina chhuakah hian mi maktaduai 2.3 vel chu ram chhung hmun dang leh ram pawnahte an tlanchhe tawh a, harsatna tawk chhawmdawl ngai hi mi maktaduai 18 chuang an nih thu a sawi a, heng zingah hian naupang maktaduai 6 an tel. UN World Food Programme chief operating officer, Carl Skau chuan buaina avanga tlanchhiate awm khawmna hmun pali zinga hmun pakhatah chuan ei tur an tlachham ṭan tawh niin tun thla tir lam khan a lo sawi tawh a ni.
