China-in US lakah complaint a theh lut

China chuan United States (US)-in energy vehicle sector (electric vehicle)-a subsidy a pek chungchangah World Trade Organisation (WTO)-ah complaint a theh lut a, US thiltih dan chu competition dik lo taka kalpuina a ni, a ti.

China Ministry of Commerce chuan WTO-a complaint an theh luh chungchang hi sawiin, US hmalak dan chu an dodal tih a sawi a, WTO rules zawm turin an phut.

Kumin kum tir khan China hian Japan lehpelin, khawvela motor thawn chhuak tam ber ram a ni. Kum 2023 khan car maktaduai 5.22 a thawn chhuak a, heng zinga hmun thuma ṭhena hmun khat hi electric motor an ni.

'US-in climate change venna tur, carbon emission tihtlemna tur leh leilung humhalhna tur tiha subsidy a siam hi a hmai kawr mai a ni a, hetianga a tihna chhan hi US siam chauh leh, a duhsak bial bik aṭanga lak luh motor-te chauh hmang tura mipui a nawrna zawk a ni," tiin China chuan a sawi.

US chuan China complaint theh luh hi a chhang ve nghal a, US Trade Representative Katherine Tai chuan China chu dik tawk lo taka thil kalpui reng leh, non-market policy hmanga motor siamchhuaktu lian ber nihna hauh zel tuma hma laah a puh let thung.

WTO lam chuan China complaint theh luh chungchangah eng angin nge hma a lak dawn a la sawi lo. WTO danah chuan, member-in WTO agreement palzuta member dang a puh a nih chuan, eng inremna ber nge a bawhchhia nia a puhnate a zir chiang phawt ṭhin. Hemi hnuah hian complaint theh luttu leh, inremna bawhchhiaa puh ram aiawhte hi inbiakna a neihpui leh a, inremna an siam theih loh chuan judicial panel-in ngaihtuah chhunzawmin, thutlukna an siam ṭhin a ni.