US vice-president, Kamala Harris chuan Selma, Alabama-a thu a sawinaah, Israel leh Hamas inbiaknaa kar ruk chhung inkahhai puan rawtna chu pawm ni se a duh thu tarlangin, Israel chu Gaza-a ṭanpuina thawn luh muang lutuk vanga a dem thu a sawi bawk.
Kamala Harris chuan,"Gaza-a tawrhna nasa tak thleng mek ngaihtuahin, a hma lama kar ruk chhung inkahhai puan hi pawm a ngai a, hei hi inbiakna neih meka sawi ho lai pawh a ni," tiin, inremna chuan hrena awm mekte chhuahna leh, ṭanpuina thawn luhna hun a siamsak tur thu te, Hamas pawhin inremna hi pawm se a duh thu a sawi. US VP hian Gaza-a ṭanpuina thawn luh kawngah Israel sorkar chu sawisel bawkin,"Israel sorkar hian ṭanpuina tam zawk Gaza-a thawn luh a nih theih nan hma a lak a ṭul a ni. Ramri kanna tur kawng thar hawng se la, ṭul loah khuahkhirhna siam lo bawk rawh se. Chhuanlam a nei tur a ni lo," a ti.
US Secretary of state, Anthony Blinken pawhin Kamala Harris thlawp hian X-ah Gaza-a ṭanpuina tam zawk thawn luh a ṭul thu hi a tarlang a,"Mipuite chuan ei tur, in tur bakah, hliam enkawlna thlengin an mamawh a ni. Hei vang hian US pawhin a theih ang angin ṭanpuina thawn hi a tum a, thlawhtheihna hmang hialin ṭanpuina tur hi thawn a ni," tiin a sawi ve bawk.
Vice President thusawi hi Israel leh Hamas indo chungchangah hian Israel lam ṭang tlat, US official-in Israel demna thu an sawi nat ber ṭum a la ni a, March 7, 1965-a Edmund Pettus Bridge bul ṭhut a mi za chuang, ralmuang taka nawrh huaihawtte beih an nih hriatrengna hun hmanaah a sawi a ni. Vice president Kamala Harris hi nimin khan Israel war cabinet member, Benny Gantz nen an inkawm bawk a ni.
