Haiti sorkarin state of emergency a puang

Haiti khawpui, Port-au-Prince tan in chu kar liam ta khan misual rualin luhchilhin an bei a, tan in aṭanga tlan chhuak mi sang chuang an awm. He thil thleng vang hian Pathianni khan Haiti sorkar chuan ram pumah darkar 72 chhung atan state of emergeny a puang.

March 6 thleng atan state of emergency puan a nih bakah, zan dar 6 aṭanga zing dar 5 thleng curfew puan a ni bawk. Hei hian an ram khawpui bakah Ouest region a huam a, ṭul dan a zira pawhsei theih a ni bawk tih sorkar chuan a sawi.

Haiti prime minister, Ariel Henry chu an ram buaina chungchang sutkian kawnga pui turin, UN thlawpnaa Kenya police thawn luh an nih theih nana inremna ziak turin a zin mek a ni. Hemi chhung hian a aiawha prime minister hna thawktu, economy minister, Patrick Michel Boisvert chuan state of emergency leh curfew puanna thu hi a chhuah a ni.

Port-au-Prince tan-in beitu misual pawl hruaitute hian an ram Prime Minister chu bang tura nawrh luih an tum thu sawiin, an ram khawpuia hmun 80% vel chu an thununna hnuaiah a awm niin an sawi.

Haiti sorkar thuchhuah chuan kar liamta kartawp lam khan Port-au-Prince leh Croix des Bouquets-a tan-in chu misual rual hian luhchilhin an bei tih a sawi. Port-au-Prince tan-ina tang zingah hian kum 2021-a President Jovenel Moise thahnaa inhnamhnawiha puh, gang member eng emaw zat an awm a ni.

Kar liam ta Ningani-a Nairobi rama Prime Minister Henry a zin chuah khan gang leader Jimmy Chérizier chuan paihthlak tumin an che dawn tih a sawi nghal a, provincial town leh an ram khawpuia armed group hrang hrang pawh an inlungrual vek niin a sawi. He thu a sawi avang hian Haiti police-te chuan an ram khawpui venhimna kawnga pui turin sipaite puihna an dil nghal a, hetichung hian Inrinni liam tak khan tan-in hi an bei thei ta tho a ni.