China min hnuaichhiahna hi titawp rawh se : Philippines Foreign Minister

ASEAN-Australia summit, Melbourne-a neih mekah Philippines foreign minister Enrique Manalo chuan China nena an buaina a sawichhuak. Philippines chuan China nena tuipui lama an ramri buai chu chinfel an duh tih sawi mahse China chu an laka inluling lutukah puhin chu chu an tihtawp a ngai tih a sawi.

China hian South China sea zawng zawng deuhthaw chu an ram chin niin an chhal a, ASEAN ram hrang hrangten an ram chin ni ngeia an ngaih pawh China chuan a chuhpui avangin ASEAN ramte leh China inkarah hian buaina a chhuah phah ṭhin a ni. Tun hnai mai pawh khan thliarkar pakhat, ram pahnihten an inchuh mek, Scarborough Shoal bulah indo lawng China chuan a tir lut a ni.

Foreign minister Manalo chuan tharum hmang ni loa buaina chinfel chu Philippines duhdan a nih thu sawiin, chutianga hmalak pui turin ram dangte pawh a sawm a, buaina chinfel chu duh mah se an ram tana channa thlen thei inremna erawh an pawm loh tur thu a sawi nghal bawk.

Enrique Manalo chuan Philippines ṭhianṭha US chuan China-in a rûn a nih chuan an ram chu US chuan a pui ngei dawn tih a sawi chiang ngam lo tih a sawi bawk. US hian Philippines chu indo a hmachhawn a nih chuan pui tur angin inremna ziak mah se Ukraine-a thilthleng avangin US puihna hi Philippines hian an hmu ngei dawn em tih a chiang lo thung. Foreign minister chuan tun kum tawpa US inthlang tur chuan ram pahnih inlaichinnah nghawng a neih theih thu a sawilang bawk a ni.