Iran sorkar chuan nimin khan Israel intelligence nena inzawmna nei leh, Israel tana thawk nia puh mi palite chu Supreme Court-in an chungthu ngaihtuah ṭhat tura a ngenna a hnawl hnuah tihhlum an nih thu a tarlang.
Heng mi pali tihhlum takte hi Mohammad Faramarzi, Mohsen Mazloum, Wafa Azarbar leh Pejman Fatehi-te an ni a, Iran sorkar hian Iraq Kusdistan aṭanga a ruka an rama lut niin a sawi. Isfahan-a awm, Iran Ministry of Defence tana ralthuam siam leh petu factory bomb tura lo lutte niin an tarlang a ni.
Iran sorkarin a tarlan danin, mi palite hi he factory bomb tur hian Israel Mossad aiawha hna thawkin, kum 2022 khan bomb tum a nih tawh thu leh, Iran intelligence-te avangin bomb a nih hmaa an pumpelh theih hlauh thu an tarlang bawk. Iranian judiciary website pakhat, Mizan online chuan Zionist spy nena inzawmna nei nia hriat mi pali tihhlum an nih thu hi a tarlang a ni.
Iran leh Israel te hi kum leh khuaa hmelma, indo reng reng an ni a, tunah hian Iran nuclear programme avangin ram pahnihte inkarah inhmuh thiam lohna a thleng leh mek a ni. Israel hian Iran hi Israel beitu Hamas leh Hezbollah-te thlawpah puhin, Iran hian Israel chu Iran official leh scientist te that ṭhinah a puh thung. Iran hian khawvel ram dang zawng aiin mi tihhlum a ngah a, heng tihhlum tura an chungthu relsakte hi khaihlum an ni tlangpui a ni. Tun ṭuma Israel intelligence nena inzawmna neia a puh, a tihhlum tak mi palite nihna kimchang hi Iran hian a tarlang lo thung.
