Istanbul khawpuiah Kristian Biak In bei

Turkey rama Istanbul khawpuiah Pathianni zinga khan Catholic kohhran Biak In chu silai keng mi pahnihte'n an bei a, mi pakhat an kap hlum.

He pawikhawihna thlenna hmun hi Istanbul-a Sariyer district-a Church of Santa Maria niin, misualte hian morning mass neih laiin an bei a ni. Pawikhawihtu mi pahnihte man an ni tawh niin Interior Minister Ali Yerlikaya chuan a sawi a, mahse, an nihna erawh sawi chian a ni lo.

Islamic firfiak pawl, Islamic State chuan Kristian Biak In beitu an nih thu hi an sawi zui a, he hi an pawl hotuin Juda leh Kristiante chu khawi hmunah pawh bei tura a hriattir anga an hmalakna a nih thu an sawi. An pawl mi leh sa pahnihte hian Biak In an beihnaah pistol hmangin mi pakhat an kap hlum a, pakhat an kap hliam bawk niin an tarlang.

Istanbul mayor, Ekrem Imamoglu chuan pawikhawihna thleng chu an dem tak zet tih sawiin, khawpui boruak muanawm tak tihchhiat tuma sakhaw hmun beih chu an ngaithiam mai dawn lo tih a sawi. Thla hmasa khan Turkey ramah hian Islamic State mi leh sa, Kristian Biak In, synagogue leh Iraq Emmbassy beih tum ni a rinhlelh mi pathum chu man an lo ni tawh bawk.