Mexico City-ah bullfighting buatsaih leh; Animal rights activist-te'n duh lohna lantir

Mexico khawpui, Mexico City-ah kum hnih chhung an chawlhsan tawh, bullfighting chu Pathianni khan kalpui leh a ni a, hei hi duh loin animal rights activist-te chuan dodalna an lantir ve nghal bawk.

Kum zabi 16-na hunlai vel aṭanga Mexico rama an lo neih ṭhin, bullfighting hi animal rights activist lam aṭangin dodalna a nasa hle a, court-ah hial zualkoin, judge chuan tiam chin awm loa titawp turin a lo rel tawh a ni. Mahse Supreme Court chuan thla hmasa khan bullfighting tihtawpna tur thupek hi a sut leh a ni. Hei vang hian a thlawptu leh dodalna lam pawh an inbeih chhoh leh hle a rinawm.

Judge thupek avanga kum hnih chhung chawlhsan a nih hnuah, Supreme Court-in thupek a sut leh tak avangin Pathianni khan Mexico City-a khawvela bullfightinga arena lian ber, Plaza Mexico-ah buatsaih leh a ni a, a en turin mi sing tel an pung khawm. Hetih lai hian activist-te chuan Plaza pawn lamah banner nen an duh lohna an lantir bawk a, ransa pawisawi lo tihhlum ṭhin chu tihtawp an duh thute an tarlang.

Humane Society International-in a tarlan danin, khawvel pumah kum tinin bullfighting avang hian bawng chal 250,000 vel an thi ziah a ni. Mexico rama hmun tam zawkah bullfighting hi phal a ni a, hei bakah France, Portugal, Colombia, Venezuala, Peru leh Ecuador-ah pawh phal a ni bawk. Spain-ah pawh phal ni mah se, khawpui ṭhenkhat erawh chuan an khap tawh thung.

Hetih lai hian Mexico-a National Association of Fighting Bull Breeders chuan bullfighting avang hian direct job 80,000 leh indirect job 146,000 a awm phah niin an sawi ve thung. Association hian bullfighting vawrh larna turin event leh workshop-te an buatsaih ṭhin.