Palestinian firfiak pawl, Hamas senior leader, Moussa Abu Marzouk chuan Hamas-te'n Israel an beihnaah khan hmeichhia, naupang leh civil mite beih tel an ni lo niin a sawi.
Hetih lai hian October 7-a Hamas firfiakte'n Israel chhim lam an beih ṭuma naupang leh civil mi an kap lai video-te chu hmuh tur tam tak a awm thung. Israel chuan Hamas-te hian mi 1,400 chuang an that a, an zinga a tam ber chu civil mi niin an sawi a ni.
BBC-in a kawmnaah Marzouk hian Hamas hoin an mi hren mekte chu Israel-in Gaza Strip a beih chhunzawm reng chuan chhuah theih an ni lo tih a sawi a, 'Kan la chhuah ngei ang, mahse, indona hi a tawp phawt a ngai," a ti. Hamas hnuaia health ministry chuan Israel sipaite'n Gaza Strip an beihnaah hian mi 10,000 an thi tawh niin a sawi bawk.
Israel-ah silai licence dil thar an tam
Hamas firfiak nena an indo hnuah, Israel ram chhung hmun hrang hrangah silai licence diltu an pung chak hle.
Israel security minister, Itamar Ben Gvir chuan mi sang tel hnenah personal weapon license pek belh an ni tawh tih a sawi. Minister hian Hamas-te'n Israel an beih hnu ni hnihah khan a ministry chuan civil mi tam thei ang berte'n invenna tur ralthuam an kawl theihna turin emergency operation a ko tih a lo sawi tawh a ni. Licence pek chhuah danah pawh a hmaa hmaichhan ngeia interview neih ṭhin chu telephone hmangin an neihpui a, dilna theh lut zinga an pawmte chu kar khat chhungin licence hi pek nghal zel an ni dawn tih a sawi a ni.
Gaza hospital mamawh thlak
Jordan leh Israel chuan Gaza Strip-airfield hospital mamawh, damdawi hmanruate thlawhtheihna hmangin an thlaksak tih an sawi.
Jordan lal, King Abdullah II chuan Jordan air force-te chuan hospital mamawh zualpuite hi thlawhtheihna hmangin an thlaksak tih Thawhṭanni khan a sawi a, Israel pawhin Jordan hi a lo puih thu leh, damdawi bakah ei turte pawh an thlak tel thu an sawi.
Gaza Strip-a chhawmdawl hna thawktute chuan kawngpui dan leh Gaza chhung beih chhunzawm reng a nih avangin mipuite'n ei tur leh tui an tlachham tawh hle tih an sawi. Pathianni khan UN agency 18 leh NGO-te chuan thuchhuah inṭawm siamin, mipuite tana chhawmdawlna tur a rang thei anga pek thuai a ṭul tawh thu an sawi a ni.
