Nobel Peace Prize winner-in jail-ah nawrh huaihawt

2023 Nobel Peace Prize dawng tura thlan, jail-a tang mek Iran activist Narges Mohammadi chuan an ramin hijab rule a siam duh lohna leh, a tanna hmuna damdawi lam enkawlna pek a nih loh avanga lungawi lohna lantirin, Thawhṭanni aṭang khan chaw ngheia nawrh a huaihawt.

Kum 51 mi, Narges Mohammadi hi a thin leh chuap entir a ngai a, mahse, a lu khuhna a hman duh loh avangin entir turin hruai chhuah a ni ta lo a ni. A chhungte chuan Mohammadi hian a vein pathum-ah block a awm a, a chuap pawh a ṭha lo niin an sawi. Mahse prison official-te chuan hijab a hman duh loh avangin hospital-ah an hruai duh ta lo a ni.

Norwegian Nobel Committee chuan Iran thuneitute hnenah Mohammadi chu a mamawh ang damdawi enkawlna pe turin a ngensak a,"Damdawi ina awm ngai pawh hijap inbel luihtir tum hi mihring inlainatna awm lo leh, thil pawm theih loh a ni," a ti.

Iran-a hmeichhe dinhmun rahbeh mek do let a, hmeichhiate'n an dikna chanvo an neih theihna tura beitu, Narges Mohammadi hi October 6 khan khawvela chawimawina ngaihhlut, Nobel Peace Prize 2023 dawng tura thlan a ni. Hetih lai hian Mohammadi hi hmeichhiate tan bei a, Iran sorkar thiltih dan a dodal avangin ṭum 13 man a ni tawh a, thubuai eng emaw zat siamsakin a thubuai pangaah thiam loh chantir a ni tawh bawk. Kum 31 tang tur leh, vawi 154 vuak tura hrem niin, tunah hian jail-ah a tang mek a ni.