Ramria boruak ṭha a awmna tura thawhpui turin China-in Myanmar sipai sorkar a nawr

Myanmar leh China inrina bula Myanmar sipai leh hel pawlte inbeihna thleng leh, hel pawlin sipaite kut aṭanga trading outpost an laksak hnuah, China chuan ram pahnih inrina hmuna boruak ṭha a awm theihna tura thawhpui turin Myanmar sipai sorkar a nawr.

China asisstant foreign minister Nong Rong chuan kar liam ta Zirtawpni aṭanga Pathianni thleng khan Myanmar tlawhin, sipai hotute a kawm a ni. Minister chuan China border area-a chengte himna chu ngai pawimawh turin Myanmar sipaite chu a ngen a, Myanmar rama China mi leh sa awmte, institution leh project venhimna lam pawh tikhauh turin a chah bawk.

Kar liam ta khan China-in Belt and Road project kalpui a tumna, Myanmar hmarchhak lam Shan state-a hel pawl leh sipai nasa takin an inbei a, inbeihnaa thi zingah hian China mi pakhat telin, hliam eng emaw zat an awm bawk. China chuan inkahhai puang turin a lo ngen tawh bawk.

Myanmar sipaite'n civil sorkar thuneihna hnehchhuh a, sorkarna an siam hnuah khawthlang ram hrang hrangte chuan Myamnar ram hi an hrek mek a, hetih lai hian China leh Russia erawh chuan sipaite hi an thlawp thung. China chuan ram dangte chu Myanmar-in inrelbawlna a kalpui dan chu zahsak turin a ti. Hemi rual hian Myanmar ram chhunga pawl hrang hrangte chu an inbeihna titawp a, inbiakna hmanga boruak ṭha siam dan kawng ngaihtuah turin a ngen.