Israel prime minister Benjamin Netanyahu chuan Gaza Strip-a Hamas firfiak pawl nena an indo mekah, Israel sipaite chuan a thawh hnihna, khawmual lam aṭanga beiin, 'ground invasion' an kalpui ṭan tih a sawi.
Netanyahu chuan Hamas-te chu boruak leh lei lam aṭanga beiin, tihchhiat vek an ni dawn tih a sawi nawn leh. Israel hian indo thlawhtheihna hmangin Gaza-a Hamas pawl hmun hrang hrangte chu a bomb chhunzawm reng bawk a ni.
Tel Aviv-a press conference a neihah, Israel Prime Minister chuan an indo mek chu a hautakin a rei dawn tih a sawi a, Hamas-te'n an hren mek, mi 200 chuangte chhanchhuak tur chuan theihtawp an chhuah zel dawn tih a sawi bawk. "Tun hi indo thawh hnihna a ni ta, kan tum kan chiang, Hamas-te rorelna leh an hmunte tihchhiat vek leh, an mi hren mekte hruai kir leh vek a ni," tiin, indo chu bul an la ṭan mek chauh tih a sawi bawk.
Prime Minister-in khawmual lam aṭanga beihpui thlak ṭan a nih thu a sawi hnuah Gaza hmar lam ram chhungah Israel sipai leh tank eng emaw zat chu an lut tawh a, mahse, sipaite hian full-scale invasion erawh an la kalpui lo. Ramriah pawh sipai erawh nuai thum chuang an chhawp tawh bawk a ni. Boruak leh khawmual bakah, tuipui lam aṭang pawhin beihpui hi an la thlak zel dawn tih Israel Defence Force (IDF) chuan an tarlang.
Israel hian Gaza-a hospital lian ber chu Hamas firfiakte'n bihrukna atan an hmang tih an sawi a, nimin khan hospital bul vel hi an bomb. Hospital hnuaiah hian Hamas-te hian post an siam niin an sawi.
Hamas-te'n tang inthlen an duh
Hamas chuan October 7-a Israel an beih ṭuma an mi man zinga mi pali chu an chhuah tawh a, tunah hian mi 200 chuang an la hreng mek. Israel-in inkahhai a puan loh chuan an mi hrente hi an chhuah chhunzawm tawh dawn lo tih an sawi hnuah, thu dang an rawn nei leh.
Gaza-a Hamas hruaitu, Yahya Sinwar chuan Israel rama Palestinian mi tang mekte leh, Hamas-te'n an mi hren mekte chu inthleng an remti tih an sawi. Thuchhuah a siamah Sinwar chuan,"Israel rama jail hrang hranga Palestinian tang zawng zawngte chhuah an nih theih chuan, kan mi hren mekte nena inthleng tura inremna siam kan inpeih a ni," a ti. An thuchhuah chungchang hi Israel lam chuan an la chhang lo.
Israel rama tan in 19 leh West Bank-a tan in pakhatah Israel-in a man, Palestinian mi sang tel an tang mek a ni.
