Bangladesh eptu hruaitu Alamgir man

Bangladesh eptu pawl, Bangladesh Nationalist Party (BNP) secretary general, Mirza Fakhrul Islam Alamgir chu nimin khan police-te'n an man.

Eptu pawl hian an ram khawpui, Dhaka-ah Inrinni khan sorkar duh lohna rally lian tham tak an huaihawt a, rally an neih tukah Alamgir hi man a ni. Dhaka Metropolitan Police Commissioner Habibur Rahman chuan rally neihnaa buaina chhuak kaihhnawihah thu zawh fiah tura hren a nih thu a sawi. Inrinnia rally neihnaa buaina chhuakah police officer pakhat leh kawngzawh zinga pakhat an thi a, hliam tuar eng emaw zat an awm bawk.

Bangladesh hian nakkum January thlaah inthlanpui an nei dawn a, hetih lai prime minister Sheikh Hasina kaihhruai sorkar laka lugnawi lohna lantir a ni fo a, hei vang hian eptu pawl hruaitu eng emaw zat chu man an ni tawh. Man zingah hian prime minister hlui Khaleda Zia pawh a tel.

Inrinnia nawrh huaihawtte hi eptu party lian pahnih, BNP leh Islamist Jamaate-Islami te an ni a, kawngzawhte leh police-te hi innawr buaiin, mipuite hnawh darh nan police-te chuan tear gas leh rubber bullet-te an hmang. Pung khawmte hian police motor-te an suasam bawk a ni.