France-a Nanterre hmuna taxi driver kum 17 mi, Nahel M thihna avanga mipui nawrhna lantirte chuan lirthei tam tak tihchhiaa halin, in thenkhat an hal bawk a, Nanterre chhehvela khawtlang nunphung a tibuai nasa tawh hle. Buaina kaihhnawihah hian police-te chuan mi 180 an man tawh a ni.

Nanterre hi France khawpui daia awm a ni a, Nanterre-a thil thleng avang hian France khawpui dang, Lille, Toulouse leh Paris khawpui dai velah te pawh lungawi lo pung khawmte hian police station, town hall leh school ṭhenkhat beiin, thi leh hliam an awm erawh hriat a la ni lo.

Police-in Nahel an kah hlum avang hian Nanterre hmuna tleirawl rualte chu lungawi lohna lantirin an pung khawm a, police-te nen innawr buaiin, nimin thleng khan pungkhawmte hian motor tam tak an hal tawh a, building ṭhenkhat an hal bawk. Buaina chhuakah hian police officer 170 an hliam tawh bawk.

Nimin khan buaina chhuahna hmun hrang hrangah dan leh thupek keng kawh turin police officer 40,000 dah belh an ni.

Buaina chhuak avang hian France President Emmanuel Macron chuan nimin khan emergency meeting a ko. Meeting-ah hian mipuite chu Nahel-a thihna zahna lantir tura ngenin, buaina siam hun a nih tawh lo thu a sawi.

Nahel tiha hriat taxi driver hi French-Algerian chhungkuaa piang leh seilian a ni a, Thawhlehni khan police-te hian a taxi khalh lai chu tidingin check an tum a, a tlan luih leh hnuah police-te hian an kap ta niin an sawi. He thil thlen lai video hi social media lamah pawh a darh nasa hle. Nahel-a kaptu police hi thuneitute'n an la tawh a, thubuai siamsak a nih tur thu prosecutor officer chuan a tarlang.

Nikum khan France-ah hian police-te'n check an tum laia tlanchhia, police-te'n um zuia an kah hlum hi mi 13 an awm. An mi kah hlum zinga a tam zawk hi mihang leh Arab hnam an ni. Kum 2017-a dan an siam ṭhatah, police officer duty laite hi ralthuam hman theihna tur thuneihna sang tak pek an ni a, mahse, police kut tuara thi an awm leh ṭhin avangin sawisel a hlawh chho hle a, hei vang hian he dan hi an zir chiang leh mek a ni.