Sudan ram thuneihna inchuha sipai leh paramilitary force, Rapid Support Force (RSF)-te inbeihna thlengah mi tam tak an thi a, thi zingah civil mi 50 chuang an awm nia sawi a ni.
Sipaite leh RSF hi thuneitu nih an inbei mek a, an ram khawpui Khartoum-a presidential palace, state TV leh army headquarters changtu zawk nih an tum a ni. Inrinni khan inbei ṭanin nimin khan Khartoum bakah ramchhung hmun dangah pawh an la inbei chhunzawm a ni. Sipai leh RSF hian Khartoum khawpuia hmun pawimawh leh, an ram airport chu an kutah a awm niin an inchhal ve ve.
Khartoum International Airport chu official-in khar a nih thu puan ni lo mah se, inbeihna thlen hnu hian flight tam zawk cancel a ni tawh. Airport thununtu zawk hian an mamawh chawk lutna chu an thunun theih dawn avangin pawl pahnihte tan hian a pawimawh hle a ni.
Sudanese Doctors Union chuan inbeihna thlengah hian civil mi 50 chuang an thi tawh niin an sawi. Sipai leh RSF mi leh sa zinga thi zat erawh hriat chian a ni lo a, mi 600 dawnin hliam an tuar niin an sawi bawk.
Sudan army leh RSF-te hi kum 2021-a civil sorkar paihthlak a nih ṭum khan an thawkdun a ni. Mahse an inkar boruak a chhe chho zel a, tun ṭuma inbeihna thlengah hian an mawhphurtu zawkah an inpuh tawn a ni.
General Abdel-Fattah al-Burhan, Sudan military commander chuan RSF sipaite hian Khartoum chhim lamah sipaite chu tibuai hmasain, buaina chawk chhuaktu zawk an ni tih a sawi. RSF hian Inrinni khan army headquarters leh a chenna in pawh an bei tih a sawi a, Khartoum airport-ah lutin thlawhtheihna ṭhenkhat pawh an hal niin a sawi. Mahse khawpui hmun pawimawhte chu sipaite kutah a la awm tih a sawi bawk.
Hetih lai hian RSF hotu, general Mohamed Hamdan Dagalo chuan Burhan chu RSF sipai nena indona chawk chhuaktuah a puh thung. An inbeih mekna aṭang chuan ni rei lote hnuah an ram buaina chinfelna tur a thleng dawn nia sawiin, he inbeihnaah hian a tlem thei ang mihring inhloh an tum tih a sawi.
RSF hian Khartoum khawpuia sorkar hmun pawimawhte bakah, hmarlama Merowe khawpui chu an kutah a awm tawh niin an sawi a, mahse sipaite chuan thu dik lo niin an sawi ve thung.
United Nation secretary-general Antonio Guterres, European Union hotu Josep Borrell, African Unoin Commission hotu Moussa Fakim Mahammat, Arab League chief Ahmed Aboul Gheit leh ram hrang hrangte chuan Sudan sipai leh RSF chu an inbeihna titawp turin an ngen a, inremna kawng zawnga inbiakna nei turin an ngen.
Kum 2021-a sipai chakna hmanga paihthlak, Sudan prime minister hlui Abdalla Hamdok pawhin pawl pahnihte chu inbeihna an tihtawp thuai loh chuan, buaina hi a punlun chho zel dawn tiin inbeihna titawp turin a ngen ve bawk.
