Bangladesh khawpui, Dhaka-a thawmhnaw zawrhna bazarpuiah nimin khan kangmei a chhuak a, dar 3,000 vel a kang.
Kangmei hi nimin zing dar 6:10 vel khan Bangabazar-ah a chhuak a, kangṭhelhtu 600 vel leh sipaiten kang ṭhelh hna hi an thawk a ni. Kangmei chhuak hian Bangabazar leh a bula sumdawnna hmun pathumte a kangral vek niin an sawi. Kangmei chhuak vang hian mi pariat an hliam a, thi erawh an awm hriat a ni lo. Hliam zinga pahnih hi kangṭhelhtu pawl zinga mi an ni. Bangladesh Air Force chuan helicopter hmangin kangmei hi a lo ṭhelhpui bawk.
He bazar hi Western fashion brand hrang hrang, Bangladesh-a thawmhnaw siamchhuah, export standarh pha lote zawrh chhuahna hmun a nih avangin a lun thei hle. Dhaka South City Corporation enkawl niin, kum 10 liam ta chhungin kangmei nasa vak lo hi bazar-ah hian ṭum ruk vel a lo thleng tawh bawk.
Bangladesh-a sumdawnna hmunte hi enfiah ṭhat tawk an nih loh ṭhin vang leh, kangmei laka invenna tur ruahmanna a awm ṭhat loh avangin kangmei a chhuak fo a ni.
Nimina bazarpui kan chhan hi hriat a la ni lo.Bangabazar Market-ah hian dawr 3,000 vel leh hnathawktu mi nuai 1.5 vel an awm nia sawi a ni. Eid a hnaih avangin dawr hrang hrangte pawhin thawmhnaw leh bungruate an inlakkhawm tam lai a nih thu an sawi.
Kum 1995 khan Bangabazar hi a lo kang ral vek tawh a, kum 1995-ah an din thar leh a ni. He bazarpui hi hmun li–Bangabazar Complex, Gulistan Unit, Mohanagar Unit, leh Adarsha Unit-ah ṭhen a ni. Kum 2018, July 24 khan Gulistan unit hi kangin dawr eng emaw a lo kang chhe tawh bawk.
