Pakistan Supreme Court-in Punjab inthlan hun tur ruat

Pakistan Supreme Court chuan Election Commission of Pakistan (ECP)-in province pahniha assembly inthlan neih tur a tihkhawtlai sak chu ram danpui kalh a ni tiin a hnawl a, inthlan neih tur hun a puang zui.

Court chuan Punjab leh Khyber Pakhtunkhwa provincial assembly inthlan chu May 14-ah buatsaih turin thupek a tichhuak a ni.

Kumin January thla khan prime minister hlui, Imran Khan kaihhruai Pakistan Tehreek-e-Insaf (PTI) party chuan an ram inthlanpui buatsaih thuai a nih theihna turin, an party thunehna province pahniha assembly hi a lo ṭhiat a ni. An ram tihdan phungah chuan national leh provincial election hi neih kawp a ni ṭhin. An ram danpui hnuaiah ECP hian legislative assembly ṭhiah a nih aṭanga ni 90 chhungin inthlan a buatsaih a ngai bawk.

Mahse ECP hian an ramin sum lama harsatna a tawh mek avanga sorkar laipuiin inthlan buatsaihna tur sum a pekchhuah theih loh avangin, province pahniha inthlan neih hun tur hi a tikhawtlai a ni. ECP hian thla hmasa khan Punjab inthlan neih hun atan hain April 30 a ruat a, mahse March 22 khan hei hi sut letin, October 8-ah neih turin a ti leh. Hei vang hian PTI chu lungawi loin, Supreme Court-ah petition an thehlut ta a ni.

Supreme Court chuan May 14-ah provincial election nei tura thupek a tihchhuah bakah, sorkar laipui chu inthlan buaipuina tur hian April 10-ah Rs tld 20 pe chhuak hman tur leh, ECP pawh April 11-ah fund awm zat thehlut turin a hriattir nghal bawk.