NATO member thar atan Finland lawmluh a ni

Finland ram chu nimin khan North Atlantic Treaty Organization (NATO) member thar atan lawmluh a ni a, NATO member 31-na a ni.

NATO kum 74 tlin champha, nimin khan member thar lawmluhna hi neih a ni. Brussels, Belgium-a NATO headquarters-a flag-raising ceremony neihah Finland president Suali Niinisto bakah NATO ram minister-te an tel. NATO headquarters-ah Finland ram flag chu zar tel a ni ve ta a ni. Hetih lai hian member diltu ram dang, Sweden dilna erawh member ramten an la pawm kim lo.

NATO secretary-general Jens Stoltenberg chuan Finland ram lakluh a nih hmaa chanchinthar lakhawmtute a kawmnaah, Finland security tan leh NATO pum tan pawh ni duhawm tak tur a nih thu a sawi. Russia president Vladimir Putin chungchang pawh sawi zuiin, "President Putin chuan NATO member tihtlem tumin Ukraine lakah indo a puang a, mahse a thil tum letling ang thawkin a thleng ta zawk a ni," a ti. Putin hian nikum February thlaa Ukraine ram an run chungchangah, an thiltih chhan pakhat chu Ukraine rama NATO rawn inzarpharh zel a, thunun an tum vang niin a lo sawi tawh a ni. Sweden-in NATO member a dilna chu Hungary chuan an ram PM Vitor Orban policy an sawisel chungchangah an la dansak a, mahse anni pawhin Sweden dilna hi an pawmpui ve leh thuai rin a ni.

Finland hi a ram khawchhak lamah Russia nena inriin, ramri hi km 1,340 zeta thui a ni. NATO-ah a tel tak avangin, Russia leh NATO member ramte inrina hi a letin a thui phah dawn ta a ni. NATO hian Baltic Sea-ah member ram pasarih a nei ta bawk.

Russia chuan a lo vau lawk nghal a, deputy foreign minister Alexander Grushko chuan NATO chuan an member thar, Finland ramah ṭangrual ram sipai emaw, ralthuam emaw an dahlut a nih chuan, Russia chuan a ram himna turin hma a la ve nghal ang tiin a lo sawi nghal.