Israel prime minister Benjamin Netanyahu kaihhruai right-wing sorkarin an ram judicial system thlak tuma a hmalakna duh loin mipuiten nawrh an huaihawt chhunzawm zel.
President Isaac Herzog chuan mipuiten lungawi lohna an lantir chhunzawm reng vangin nimin khan PM Netahyahu leh a kaihhruai ṭangrual sorkar hnenah ngenna siamin, Israel mipuite inpumkhatna tur leh sorkar mawhphurhna hriaa an hmalakna tawpsan rih turin a ngen. Israel President hi ram hotu lu ber ni mah se, politics thilah a inrawlh ngai lo hle a, mahse ram chhung boruak ṭha lo zel avangin sorkarah ngenna hi a siam ta a ni.
Kar liam ta Inrinni-a TV-a thu a sawinaa judicial system thlak tumna sawiseltu, defence minister Yoav Gallant chu PM Netanyahu chuan minister a nihna aṭangin a ban nghal. Prime Minister Office chuan thuchhuah siamin, Likud Party senior member Gallant chu Defence Minister a nihna ṭanga ban a nih thu chauh tawitein a tarlang. Hemi hnu hian Netanyahu chuan chak taka an din tlan zel a ṭul thu a twitter-ah a ziak zui bawk.
PM Netanyahu-a'n a defence minister a ban thu puan a nih hnuah, Pathianni zan khan mipui lungawi lote chu khawpui hrang hrangah an pungkhawm leh. Tel Aviv-ah chuan pungkhawmte hian thawmhnaw pawl inbelin Israel flag an keng a, zan rei tak thleng kawngpuite danin, khawlaiah thil an hal bawk. Jerusalem-ah pawh PM private home pawn lamah mi eng emaw zat an pungkhawm a, mahse pungkhawmte hi police-ten an hnawtdarh a ni.
President Herzog-a'n ngenna a siam hnuah, PM Netanyahu chuan judicial plan chungchanga thuchah a tichhuak dawn a, an hmalakna pawh chawlh lailawk rin a ni. Hetih lai hian minister ṭhenkhat, a bikin national security minister Itama Ben-Gvir te chuan hnungtawlh mai lo turin PM hi an lo nawr ve thung.
