SKorea-in fa 3 nei chinte sipai ṭan ngai loin ngaihhnathiam tum

South Korea chuan an rama mihring punna tlahniam zel siamṭha a, nau piang an tam theihna tura a hmalakna kawng khat atan, mipa kum 30 tlin hmaa fa pathum nei chinte chu sipaia an ṭan kher ngai loa ngaihhnathiamna siam a tum.

South Korea ram danah chuan an rama mipa, pianphunga harsatna nei lo kum 18-28 inkar chu thla 18-21 chhung sipaia an ṭan ngei ngei a ngai a ni.

Khawvel ram hrang hrangah mihring punna a tlahniam nasa hle a, South Korea hi nau piang thar tlem berna ram zingah a tel. Hei vang hian rorellai, conservative People Power party pawhin nau piang an pun chhoh theihna turin ruahmanna a siam chho mek a ni. Fa pathum nei chin sipaia ṭan ngai loa ngaihhnathiamna tur hi ngaihtuah mek a la ni chauh a, pawm fel a la ni lo.

Hetih lai hian he ruahmanna hian sawiselna pawh a tawk nasa a, tleirawl tea fa neih tir an tum em ni tia sorkar zawt letin, fa ngah tana chhungkaw inenkawlna hautak ziate an sawi bawk. Expert ṭhenkhat chuan he ruahmanna hi thil hlauhawm leh nuihzatthlak zawk niin an sawi a ni.