Hacker-ten Australia leh New Zealand-a mi mtd 14 personal record ruk sak

Consumer lender Latitude Financial company chuan Australia leh New Zealand-a an client, mi maktaduai 14 vel personal data chu hacker-ten an ruksak tih nimin khan an puang.

Tun thla tir lam khan hacker-ten an tihbuai tih hi sawi lan a ni tawh a, mahse an zirchian hnuah an khawih buaisak te hi an rin aiin an lo ṭhahnem hle a ni. Ram pahniha cheng mipui awm zat aṭanga a zahve dawn an tling.

Company chuan nimin khan thuchhuah hi siamin, an customer-te chungah ngaihdam an dil nghal bawk. Hacker-te hian Australian leh New Zealand driver licence detail hi makduai 7.9 bakah, passport number 53,000 an ruk chhuahsak a ni. Heng bakah hian mi maktaduai 6.1-te hming, address, telephone number leh pian kumte an ruksak bawk.

Latitude Financial hian an buai tirhah chuan hacker hian an customer nuai 3.3-te information an ruksak niin an sawi a, mahse a hnuah mi maktaduai tam tak a nghawng tel tih an hre leh a ni. Chief executive Ahmed Fahour chuan pawi an ti takzet a, heng information-te hi him taka lakkir leh vek tuma theihtawp an chhuak mek thu a sawi.