Ukraine president Zelenskyy chuan Russia sipaite an ram an laksak zinga hmun ṭhahnem tak an chu an laklet leh thu a sawi.

Ukraine khawchhak lam, Kharkiv region-ah tunhnai khan an ram an laklet leh thu hi an sawi a,official erawh chuan thuchhuah an la siam lo thung.

President Zelenskyy chuan an ram laklet te hming chu a sawilang duh lo a, tun hi sawi chhuahna hun a la ni lo a ni, a ti.

US official-te pawhin Ukraine hian Russia sipaite lakah zawi muangin hmasawnna hmel an hmu zel tih an sawi ve bawk. US-a Under-Secretary of Defense for Policy, Colin Kahl chuan hmun ṭhenkhatah Ukraine sipaite chu Russia sipaite aiin an che ṭha zawk tih a sawi.

Video kaltlanga a thusawiah, Zelenskyy chuan Ukraine sipaite hlawhtlinna thawm lawmawm hriat tur a awm thu sawiin, "Kan khua leh tuite hian kan sipaite hi an chhuang vekin ka ring," tiin military unit ṭhenkhat hmingte pawh lam riin an huaisenna chu a fak a ni.

Ukraine sipaite chuan Donetsk region chhim chhak lam aṭangin Kharkiv region-ah beihpui an thlak thar leh a, heng hmun hi thla ruk liamtaa Russia-in an ram a do hnua thununna hnuaia a lo dah tawhte a ni.

Report ṭhenkhat chuan Ukraine sipaite chu Izyum khawpui aṭanga hla lo teah an awm nia sawiin, hei hi Russia military supply chain kalkawng pawimawh tak a ni.

Ukraine General Staff chuan Nilaini zana mipui hmaa thu a sawiah, an ram chuan Kharkiv leh Donetsk region-a Russia beihna zawng zawng chu an dangchat vek thei tih a sawi. Hetih lai hian ram pahnih sipaite hi artillery leh air strike hmangin an la inbeih chhunzawm zel a, hmun tam takah chhiatna a thlen phah nasa hle.

President Zelenskyy chuan Nilaini vek khan, nakkuma Ukraine national budget chu indona pual bika serhhran a nih tur thu leh, defence lamah hryvnia tld chuang (USD tld 27) an dah tur thu a sawi bawk. Hetihrual hian vantlang tana hamṭhatna an siam, pension-te chu vawnhim sak an la ni reng dawn tih a sawi nghal bawk.

"Ṭul loa pawisa hmanna tur chu a tam thei ang ber tihtlem a pawimawh a ni," tiin "venhimna, economy hmasawnna tur leh ram hmasawnna lama ṭangkai lo chu paih an ni ang," a ti.

Zelenskyy chuan National Security leh Defense Council of Ukraine chuan Security Council of Russia,Council of the Federation of Russia leh Duma-a hnathawk mi 606 te hrekna an tichhuak tih a sawi bawk. "He indonaah hian mawh an phur a, kan mite chunga tharum thawhtute an ni. An vai hian hrem lohin an chhuak lo ang," tiin Zelenskyy chuan a sawi.

Hetih lai hian Russia-a rorellai party hotu chuan Ukraine-a Russia-in a awp bial mite chuan November 4-ah Russia hnuaia awm an duh leh duh loh chungchangah vote an thlak dawn a ni, a ti. "An zinga 80% chuan an duh an thlang dawn tih kan chiang a ni," tiin Kherson region-a Moscow ruat deputy head, Kirill Stremousov chuan a sawi.