East Jerusalem-ah inthlan phalsak tura Israel sorkar nawr turin ramdangte ngen

Palestinian prime minister Mohammed Ishtaye chuan Nilaini khan khawvel ram dangte chu Palestinian territory huam chhung, East Jerusalem pawh huam telin inthlanpui an buatsaih theihna tura Israel nawr turin an ngen.

West Bank-a Ramallah khawpuia Middle East-a Norwegian special envoy, Hilde Haraldstad nena meeting an neihah, Ishtaye hian he ngenna hi a siam a ni.

PM Ishtaye chuan ramdangte chu Israel-in Palestinian pawisa leh dan dik lo hmanga Palestinian tax revenue an laksak chu tihtawp tir turin a ngen bawk.

Israel chet dan rawng takte pawh Haraldstad bulah sawiin, sorkar thupeka inthahna theng te, in man te, al-Aqsa mosque luhchhuah a ni fo dan te, Palestinian ram luahsak leh Juda-te chenna tur hmun a siam belh sak zel dante a sawi.

Meeting-ah hian October thlaa New York-a donor's conference neih tur chungchang pawh sawidunin, Israel-Pales­tinian buaina chinfena atana two-state solution siam tumna chu a hlawhtlin theih dan turte an sawi dun bawk.