Covid-19 hri chi thar inkaichhawn awl tak, Omicron coronavirus sub-variant BA.2 chu Africa ramah hmuh a nih tawh thu leh he hri darh dan hriat theihna atan ram hrang hrangte chuan coronavirus sample tam zawk an endik a ṭul thu World Health Organization (WHO) chuan a sawi.

Tun thleng hian he strain thar hi Africa khawthlang ram Senegal, Africa khawchhak ram Kenya, Malawi, Botswana leh South Africa-ahte hmuhchhuah an nih tawh thu WHO-a virologist Nicksy Gumede-Moeletsi chuan a sawi a ni. "Sample kan lo endik tawhte aṭangin BA.2 hi kan hmuh hmaih palh ani mai ang tih kan hlau a ni," a ti.

BA.2 hi omicron strain hmasate aiin inkaichhawn a awlsam tih scientist-te'n zirchianna an neih aṭangin an tarlang. Omicron hi nikum November thla khan South Africa leh Botswana te chuan an hmuhchhuah thu an lo puang tawh a ni. Zirchianna chuan strain thar pahnih zinga a eng emaw zawk kai tawhte hian Omicron kai nawn theihna laka veng turin natna dona an nei chak tawk lo mai thei tih an sawi.

BA.2 hi South Africa-ah chak takin a darh mek a, ram pasariha province pakuaah hmuhchhuah a ni tawh a ni. Gene-sequencing institution neitu bio-informatics professor Tulio de Oliveira chuan he hri hi hri leng mek tizual leh theitu a nih theih thu sawiin, sorkar pawh hri dona kawnga hmalak dan turah thurawn a pe.