US-a silai hmanga pawikhawihna hluar zel karah Preident Biden-a'n hmalakna tur thar a tichhuak

United States president Joe Biden chuan Ningani khan ramchhunga silai hmanga pawikhawihna tihtlem tumin hma lakna thar tur ṭhahnem tak a tichhuak.

President Biden kaihhruai sorkar chuan dan dik lo hmanga silai kawltute dap chhuah hna a thawk dawn a, silai chhinchhiah loh hmanga pawikhawihtute thubuai siamsak an nih theihna turin prosecutor-te theihtawpa puiin, dan dik loa silai hralhtute umzui zel a tum dawn tih White House chuan a sawi.

Ningani khan President Biden hian New York City a tlawh ṭumin, tualchhung police leh law enforcement agency tana sum tam zawk dah a ṭul thu a sawi.

"Kan kawtthlerte rauhsan ringawt hi a chhanna tur a ni lo a, police ṭanpuina sum pek tihtawp hi a chhanna a ni hek lo. Hmanraw ṭha, training, ṭha taka min venhim a kan thawhho theihna turin sum pek hi kan tihtur zawk chu a ni," tiin US president chuan Lower Manhattan-a New York Police Department headquarters-a thu sawinaah a tarlang.

Biden hi U.S. attorney general Merrick Garland, U.S. senator Kirsten Gillibrand, New York governor Kathy Hochul leh New York City mayor Eric Adams-te'n an ṭawiawm a ni.

"Silai hmansual hi New York khawpui emaw New York state chauhin buaina an tawh a ni lo a, rampum huap buaina tling phak a ni," tiin Hochul chuan twitter kaltlangin a sawi.

Silaia inkahna vanga thi hi United States-ah tunhnai kum hnih chhung khan an pung hle. Nikum chhung khan silai hman sual vanga thi mi 20,794 an awm a, kum 2020 khan thihpui 19,490 awmin, hri len hma kum 2019 khan 15,474 an awm thung tih Gun Violence Archive chuan a tarlang. Kumin chhung hian United States-ah silai hmansualna ṭum 1,554 zet a thleng leh tawh tih data chuan a tarlang bawk.