Ecuador khawpuia tuilian vangin mi 26 thi tawh

Ecuador khawpui Quito-a tuilian nasa tak thleng vanga thi zat chu Ningani thleng khan mi 26 an tling tawh a, mi 10 chu zawn hmuh an la nih loh bakah mi 53 velin hliam an tuar tih Mayor Santiago Guarderas chuan a puang.

Tuilianin chhiatna a thlen dante an zirchiannaah, chenna in pariat chu an tlusawp a, chenna in 24 chu thawmṭhat ngai khawpin a tichhe bawk a, hei bakah motor 27, two wheeler 22, Quito electric company utility pole 20 leh substation pasarih a len chhe bawk a ni.

Quito hmarthlang lama hun rei tak ruahsur avangin Belisario Quevedo-ah tui hi a lian a, tulian hian chirh, lung leh bawlhhlawhte chu a ṭhenawm La Gasca leh La Comuna lamah lenin an lo tawrh phah bawk a ni.

"Area-ah chhiatna thlen theihna awm ang kan nei tawh rih lo a ni," tiin Guarderas chuan a sawi a, "Tui chim chin pawhin kiam lam a pan a, buaina pawh a ziaawm tawh e. Thing leh thir ban tlute pawh laksawn an ni tawh" tiin thenfai hna an thawh dan chungchang a sawi. Hetihlai hian chhanchhuah hna thawktute zinga an hotu, Ecuador vice president Alfredo Borrero chuan institution hrang hranga mi 3,732 te chu chhanchhuah hna thawk tur leh ei leh in semchhuak tura an tirhchhuah thu a sawi.