Afghanistan ram aṭanga United States sipai lakchhuah an nih chungchangah US President Joe Biden chuan a thutlukna siamah hian a inchhir lo a, an hmalaknaah ngaihdam dilna chhan tur a awm loh thu a sawi.
US sipaite'n an chhuahsan hnua Afghanistan-a Taliban ten rorelna an chan chhunzawm erawh pawi a tih thu Biden chuan a sawi nghal bawk. "Ka thiltihah inchhirna ka nei lo a. Lo awm chhunzawm ta zel ila, sipai 20,000-50,000 dah tura beisei kan ni ang. Kan chhuahsan vanga Taliban te'n thuneihna an chang chhunzawm ta erawh pawi ka ti hle a ni," a ti.
Kum 20 zet US sipaite dah an nih hnuaah felfai taka inlakchhuah mai chu a theih lo a ni tih sawiin, an thiltih danah chuan ngaihdam dil a tum lo tih a sawi bawk. Hemi rual hian an inlakchhuak hun laia firfiakte pawikhawihna thlen avanga nunna chan an awm chu pawi a ti hle tih a sawi bawk. Airport-a firfiakte beihnaa hmeichhia leh mipa thita te chu rilruah an awm reng tih a sawi bawk.
Nikum August thlaa US sipaiten Afghanistan chhuahsan turte an buaipui laiin, Kabul airport-ah vawi hnih bomb puakin mi 103 an thi a, mi 143 chuangin hliam an tuar. US sipai 13, marine 12 leh Navy medic mite chu thi zingah hian an tel a, anni bakah hian service member 18 te'n hliam an tuar bawk a ni.
August 31, 2021 khan United States chuan Afghanistan-a an sipaite chu an thiarchhuak fel thei a, kum 20 chhunga beihpui an thlak an tihtawp hnu lawkah Taliban-te hian thuneihna an chang zui nghal a ni.
US-in an chhuahsan hnu hian, Afghanistan chuan harsatna lian tak an tawk chho reng a ni. Taliban-in thuneihna an chan hnu hian ramdang aṭanga ṭanpuina sum rawn lut ṭhinte pawh khawihchet theih loha siam vek an ni a, mi tam tak chu eitur tlachhamin an awm mek bawk. Taliban rorelna hnuaiah Afghan hmeichhiate pawh an dinhmun a chep chho leh tawh hle.
