Iran, China leh Russia-in Naval Drill nei

Iran, China leh Russia chuan nimin khan Indian Ocean hmar lamah a ṭum thumna atan joint naval drill an nei.

'2022 Marine Security Belt' exercise tia an vuah hi square km 17,000 huamah neih a ni a, Iran aṭangin navy leh Revolution guard-te an tel tih drill thupuangtu, Rear Admiral Mostafa Tajoldini chuan a sawi.

Drill-ah hian kangmei chhuahna lawnglian chhanchhuah dan te, misualten an hijack lawng chhanchhah dan te, zan lama an target kah fuh theih dan turte an zirho a ni.

Ram pathumte hian kum 2019 khan Indian Ocean leh kum 2020-ah Sea of Oman-ah joint naval drill hi an lo nei tawh bawk a ni.

Tajoldini chuan, "Drill neih chhan ber chu region-a security thuam chak leh innghahna ṭha siam a ni a, ram pathumten khawvela muanna a awm theihna tura hmalaknaa thawhhona ṭha an neih zel nan te, tuipui lamah security ṭha tak a awm theihna atan a ni," a ti.