Myanmar sipai court chuan nimin khan civil hruaitu paihthlak tak, Aung San Suu Kyi chu a thubuai pahnih, Covid-19 kaihhruaina dan bawhchhia leh sipai sorkar duh lohna lantir tura mipute fuiha puhnaah thiam loh chantirin, kum hnih ve ve tang turin a hrem.
Heng thubuai pahnih siamsak ve bawk, president hlui Win Myint pawh kum li tang tur hian hrem a ni ve bawk.
Sipai thupuangtu, Zaw Min Tun chuan Suu Kyi leh Win Myint-te hremna pek hi puangin, jail-ah erawh dah an ni rih dawn lo tih a sawi. "Tuna an awmna mek aṭangin an thubuai neih dangte an la hmachhawn leh dawn a ni," a ti.
Nimina Naypyidaw-a thubuai ngaihtuahnaah hian media mite an tel phalsak an ni lo a, sipai sorkar hian Suu Kyi-i lawyer-te chu media leh mipuite an biakpawh a khapsak bawk a ni.
Kum 76 mi, Suu Kyi-i February 1-a sipaiten civil sorkar thuneihna hnehchhuh a, hruaitu a nihna aṭanga an paihthlak hnuah pawn chhuak thei loin an hreng zui a, thubuai eng emaw zat an siamsak a ni. A thubuai neih zingah hian eirua puhna te, state secret act bawhchhia leh telecom law bawhchhiaa puhnate pawh a tel a, heng thubuaiah hian thiam loh chantir a nih vek chuan kum 100 chuang hremna pek theih a ni ang.
Suu Kyi chuan sipaite puhna hrang hrang hi a pha vek a, amah thlawptute pawhin thu dik lo leh a political career tihchhiat tumna mai a nih thu an sawi bawk.
Myanmar ram chhung hmun hrang hrangah sipai rorelna duh lohna lantir chhunzawm reng a la ni. Pathianni khan Suu Kyi leh civil hruaitu dang an mante chhuah phutin kawngzawh an huaihawt. Yangon-a kawngzawhte chu sipai truck-in su luiin, an zinga pathum an thi a, nawrh huaihawt zinga mi 11 chu man ani bawk niin tualchhung media report chuan an tarlang.
Amnesty International-in court thutlukna dem
Amnesty International chuan Suu Kyi-i hrema pek chu a dem thu a sawi nghal. "He hremna na tak pek hian sipai sorkarin anmahni eptute nuaibo a, Myanmar rama zalenna rahbeh a tum zia a tilang chiang hle a ni," tiin Amnesty deputy regional director for campaigns Ming Yu Hah chuan a sawi.
International Crisis Group-a senior advisor Richard Horsey pawhin he hremna pek hi sipaiten phuba a lakna leh, an thuneihna an pholanna niin a sawi bawk.
