Venezuela-ah Colombia hel hotu 'El Paisa' kaphlum

Colombia rama Farc helpawl hotu hlui, Hernán Darío Velásquez, El Paisa tiha hriat lar chu Venezuela-a Apure state-a inlambunnaah kahhlum a nih thu tualchhung media-te chuan Pathianni khan an puang.

Official-te chuan a thih thu hi an la nemnghet lo a, Colombia sipaite pawhin a thih thu hi engmah an hriat loh thu an sawi.

Colombia thuneitute chuan official te'n a ruang an hmuh hma chuan a thih thu an nemnghet dawn lo tih an sawi. Colombia president tana thupuangtu Iván Duque pawhin thuchiang zawk an ngaichang mek tih a sawi bawk.

Farc helpawl tehi Marxist group niin, kum 50 chuang chu Colombia sorkar doin, kum 2016 khan inkahhai an puang chauh a ni.

Farc helpawl hnuaia unit hlauhawm ber te zinga an commander, Velásquez hi inbeihna rawng tak taka a inhnamhnawih ṭhin avangin hriat a hlawh hle. Kum 2003-a Colombia khawpui Bogata-a car tihpuahnaa mi 36 an thihna leh mi 200 chuangin hliam an tuarnaah khan a bultumtu ber a ni. Kum 2016-a Havana peace process talk-ah khan telin, hel bansanna turin inremna pawh an siam a ni. Mahse kum 2018 khan an intiamna bawhchhiain Farc hruaitu hlui Iván Márquez leh Jesús Santrich-te nen helpawl thar, Segunda Marquetalia an din leh.

Farc helpawl member 13,000 vel chuan kum 2016 aṭang khan an ralthuamte an tung tawh a, political party siamin, an party hian Colombia Congress-ah seat 10 an nei mek a ni.

Hetichung hian Colombia ram chhung hel 5,000 vel chuan sorkar sipaite an la bei chhunzawm reng thung.