United States President Joe Biden chuan Nilaini khan US intelligence agency-te chu thla thum chhungin China aṭanga Covid-19 hri lo chhuahna chhui chiang tur leh, a hnena report thehlut turin a hriattir.

Covid-19 hri lo chhuah dan, ransa aṭangin nge laboratory aṭang zawkin tih chhui chiang a, hemi atan hian agency-te chu an hna pawh a let thawka titam tur te, hnu chhuina atana ṭangkai tur te chak zawka lakhawma ni 90 chhunga report thehlut turin a hriattir tih White House thuchhuah chuan a tarlang.

President Biden-a thuchhuah hian khawvel huapa mi maktaduai 3.4 in nunna an chan tawhna, hri lo chhuah theihna ni awma ngaih kawng hnih awm thei chu a rawn tichiang leh a ni. Coronavirus hi a hmuhchhuahna, China-a Wuhan bazar-a ransa aṭangin emaw Wuhan khawpui veka research laboratory aṭanga emaw rawn chhuaka ngaihna pahnih a awm reng a ni.

He zirchianna aṭanga an hmuhchhuah hian China lakah pawh nghawng nasa tak a nei thei dawn a, China chuan he hri leng vang hian thiamlohna an neihloh thu an sawi tawh thung.

March thla khan President Biden chuan hri lo chhuah dan report hi a lo dil tawh a, mahse US intelligence community chuan chhanna mumal an la pe theilo a ni.