Myanmar-a civil sorkar paihthlak aṭangin mi 828 thah an ni tawh

Myanmar sipaten February 1-a civil sor­kar paihthlaa rorelna an hnehchhuh aṭang khan tualchhunga buaina thleng chuan ala kiansan theilo a, Assis­tance Associa­tion for Political Prisoners (AAPP) chhinchhiah danin May 26 thleng khan lung­awilohna lantirtu zinga 828 chu thah an ni tawh a, mi 4,330 chu hren mek an ni bawk.

Taw Seint thingtlang khua, Magway huam­chhunga cheng hmeichhe pakhat chuan khaw school-ah "No to Military Slavery Education' sticker campaign a neih laiin Nilaini zan khan sipaiten kalchilhin a lu-ah an kap a, a hmunah a boral nghal tih AAPP chuan a sawi.

Myanmar sipai sorkar chuan June 1 aṭangin public school hawn ṭan a nih tur thu a puang a, mahse zirtirtu leh zirlai naupangte chuan sipai rorelna an duhloh zia lantira school kai an tum loh thu an sawi.

Kyodo News chuan zirtirtu ṭhahnem tak ten sipai laka lungawilohna lantirna kalzelah an hna chawlhsanin civil disobedience movement a zawm a, mahse sipaite chuan an hna zawm tur leh, school hawn hun atana inbuatsaih turin a hriattir.

Myanmar-a public school-te hi kum khat chuang khar a ni tawh a, nikum June thla khan Aung San Suu Kyi kaihhruai sorkar chuan coronavirus leng vangin zirna inte hi a lo khar tir a ni.

February 1-a civil sorkar an paihthlak hnu khan sipaite chuan an ram pumah kum khat chhung atan emergency an puang zui a ni.