Italy prime minister Giuseppe Conte chuan Thawhṭanni khan a bang dawn tih a sawi a, nimin khan a banna hi a thehluh fel rin a ni.

Giuseppe Conte hi coronavirus hripui leng a do dan chungchangah nasa taka sawisel a ni a, kar hmasa khan an ram rorel inpui, lower house- Chamber of Deputies-a vote of confidence a paltlang a, mahse tunkar tawpah hian an ram MP-te chuan judicial reform chungchangah vote an la leh dawn a, hei hi Conte hian a paltlang zawh loh rin a ni. Hemi hmaa a lo ban fel hian atan chuan mualphona a zia dawn nia ngai an awm nual.

Prime minister hlui Matteo Renzi,  Italia Viva party hruaituin an rama ṭangrual sorkar aṭanga a minister-te a inlakchhuah tir vangin vote of confidence hi loh theih lohin an lak a ngai a, Renzi hian hripui leng a dodal dan chungchangah Conte hi na takin a sawisel a, hripui len hnua an ram economy tundin lehna tura a hmalakna pawh a sawisel bawk.

Cabinet office-in a tarlan dan chuan Conte hian nimin khan a minister-te chu ban a tum chhan a hrilhfiah ang a, chumi hnuah President Sergio Mattarella a hmu dawn a ni. Giuseppe Conte hi kum 2018 June aṭang khan Italy prime minister a ni a, amah hi politician a nih bakah hian Italian university professor, jurist leh lawyer a ni tel bawk. Party behchhan nei lo a ni a, heti chung hian party hlawhtling tak pahnih chu sorkar siamna kawngah hian a kaihruai a, thla 15 chhung lai chu  M5S leh far-right League-te a kaihruai a, far-right lam hruaitu Matteo Salvini a inhnuhdawh leh tak si avangin inthlan ṭhat an neih leh a ngai a;  Five Star Movement (M5S) leh Democratic Party-te chu a kaihruai chhunzawm a ni.

M5S hi chuan a bang dawn tih a sawi hma lawk pawh khan Conte lama an ṭan thu an la sawi thung.