Nihna thlakthleng sipaia ṭan khapna dan Biden-a'n a hlip

US president Joe Biden chuan President atana a thlak tak, Donald Trump-a'n nihna thlakthlengte (transgender) sipaia an ṭan a khapna dan chu a hlip.

He dan hi Donald Trump hian office a luah ṭan kumah khan a puang nghal a, tunah Biden hian a rawn sut ve leh  nghal a ni. White House chuan thuchhuah an siamah, "President Biden chuan sipai ṭanna kawng daltuah gender identity chu hman chi a ni loah a ngai a, America chakna chu mi hrang hrang awmkhawmah a innghat a ni," tiin an tarlang.

Defence Secretary thar, Lloyd Austin, army general retired ni bawk chuan thuchhuah siamin hemi kawngah hian an department chuan hma an la nghal dawn tih a sawi. Kum 2017 khan twitter kaltlangin Donald Trump khan medical lam kaihhnawih chhuanlama hmanga nihna thlakthlengte chu America sipaiah pawm an ni tawh dawn lo tih a sawi a, April, 2019 aṭang khan a khapna dan hi an hmang ṭan a ni. Nihna thlakthleng, sipaia ṭang mekte erawh an ṭan chhunzawm phalsak an ni thung.

Palm Center-in data a tihchhuah aṭanga a lan dan chuan kum 2019 khan US sipaiah nihna thlakthleng hi mi 8,980 an awm a ni. President Biden hian vawi eng emaw zat chu he dan hi a sut dawn tih a lo sawi tawh a, hei bakah hian office a luah ni khan Trump-a dan lo zam sa, Mexico ramria indaidanna bang siam chungchang leh Muslim ram ṭhenkhat aṭanga US luh khapna dante chu a lo sut tawh bawk.