World Health Organization (WHO) director general Tedros Adhanom Ghebreyesus chuan US-in WHO hnena sum pek a tihtawp chu ngaihtuah ṭha leh tura a duh thu a sawi a, hemi rual hian an pawlin an ngaihtuah ber chu khawvela hri leng mek tihtawp a, mipuite nunna chhanhim chu a ni, a ti.
Geneva-ah Nilaini khan Ghebreyesus hian news conference neiin, "US-in WHO fund a tihtawp chu a ngaihtuah ṭhat leh a, WHO hnathawhna kawngah theihtawpa a puih leh ngei ka beisei a ni," tiin a sawi. WHO tana sum a pek ṭhin chu US chuan investment pawimawh tak a ni tih a hriat ngei pawh a rin thu sawiin, hei hi ram dangte a puihna a ni ringawt lo a, US a himna tur pawha thil pawimawh a nih thu a sawi.
Ghebreyesus chuan Covid-19 chu a la bo mai dawn lo tih sawiin, ram ṭhenkhat chuan he hri hi an do hneh tawh nia an inngaih laiin hri kai an pung thar leh a, Africa leh America-ahte hri kai hi an la pun belh zel a ni, a ti.
WHO emergency expert, Dr Mike Ryan chuan coronavirus rawn chhuahna ramsa hi hriat ngei a pawimawh hle tih sawiin, hemi chhui chiang tur hian WHO pawh U.N.’s Food and Agriculture Organization (FAO) leh World Organisation for Animal Health (OIE) thawhpui turin a inpeih reng a ni, a ti.
China-in USD mtd 30 pe dawn
China foreign ministry thupuangtu Huan Chunying chuan Covid-19 dona atan China-in WHO hnenah US dollar maktaduai 30 a pe dawn tih nimin khan a sawi.
Hua chuan WHO hnena sum an pek tur chu developing country-te health system thuam chakna atana an tih a nih thu a sawi. China hian March thla khan WHO hnenah hian USD maktaduai 20 a lo pe tawh bawk.
