Trump-a'n Iran lawng kap hreh lo turin a chah
US president Donald Trump chuan Nilaini khan an ram lawngte an zar buai a nih chuan Iran indo lawng chu kap hreh lo turin US Navy-te a chah.
Pentagon chuan Iran Islamic Revolutionary Guard Corps Navy (IRGCN)-te chu Persian Gulf-a U.S. Navy-te awmna lam hnaiha an kal thu leh hlauhawm zawnga an chet thu a tarlang a, hemi chungchang hi Trump chuan a twitter-ah sawi chhuakin, Gulf tuipuia US Navy awmte chu an tan hlauhthawn awma Iran Navy-te an chet chuan kap hreh lo turin a ti ta a ni.
Nilainia Trump-a'n White House-a coronavirus task force briefing a neihnaah, lawng sipai telin an ram sipaite chu dan bawhchhe kher loa anmahnia lo in veng mai tura a tih thu a sawi. US deputy secretary of defense David Norquist chuan Trump thusawi hi Iran vau lawkna a nih thu a sawi ve bawk.
Tun thla chhungin IRGCN indo lawng 11-te chu U.S. Navy leh Coast Guard ship lam hnaih 10 yard (9 m) a hnaia an kal thu Pentagon chuan a tarlang bawk. Iran sipai thupuangtu chuan US hian a sipaite hi coronavirus an kai loh nana chhanhimna kawng ngaihtuah zawk turin a ti. Gulf tuipuiah hian Iran Revolutionary Guard Corps Navy lam chuan military satellite hmasa ber orbit-an kah thu an tarlang thung.
Kumin kum tir aṭang khan US leh Iran inkar boruak hi a ṭha lo chho hle a, US-in January 3-a Iranian major general, Qasem Soleimani an thahsak khan an boruak hi a tichhe zual hle a ni.