Zimbabwe President Emmerson Mnangagwa lakluh hun tur chu eptute lamin inthlan result an complaint avangin sawn a ni.
Emmerson Mnangagwa hi nimin khan President thar atana lakluh tura tih a ni a, mahse eptu lamin inthlan result hi an khin let tak avangin ṭhulh a ni ta rih a ni.
Eptu pawl, Movement for Democratic Change (MDC) hruaitu leh president candidate Nelson Chamisa chuan July 30-a president hlanna neihah hian thil dik lo taka tih a nih ngei tih finfiahna pawh a nei niin a sawi. MDC chuan inthlan result hi tihchingpen a ni tih an sawi a, mashe hei hi electoral commission chuan hnawlin thil dik lo a awm lo niin a sawi thung.
President thlannaah hian rorel lai party, Zanu-PF party candidate Mnangagwa chuan vote tla aṭanga 50.8% hmuin, Chamisa hian 44.3% a hmu a ni.
Kar kalta Zirtawpni khan eptu party-te hian complaint an thehlut a ni. Zimbabwe ram danpuiah chuan president candidate-te hian president thlan result puan a nih aṭanga ni sarih chungin complaint hi an thehluh a phalsak a ni.
Eptu party complaint thehluh hi Constitutional Court chuan ni 14 chhungin a ngaihtuah ang. Eptu complaint thehluh hi a pawmtlat nia a ngaih chuan court hian vote tla chhiar ṭha vek tur emaw, result hnawl a inthlan buatsaih ṭha tur emawin a ti thei a ni.
Chamisa chuan inthlanah hian amah zawk chu hnehna changtu nia insawiin, court chuan hnehtuah a puang a nih loh chuan inthlan ṭhat buatsaih tir tura a duh thu a sawi.
